حكايه اب
قصة حقيقة على لسان أحد الآباء
بنتي حردت من زوجها وقعدت عندي هي وبنتها الصغيرة بكل مرة كانت تترك بيت زوجها بقلها ما بيصير تتركي بيتك وبخليها ترجع
بس هل المرة مو رضيانة ترجع ولما حكتلي شو صاير اعرفت انو الحق على صهري فأنا قلتلها معليش يا بنتي بيضل جوزك ابو بنتك وانا بنفسي راح رجعك لعندو مع انو ما اتصل ولا مرة منشان يسأل على الأقل على بنتو
اخدت بنتي ورحت وطلعت بنتي قبلي ودقت الباب فلما فتح جوزها الباب دغري قلها : لو اهلك معهم يطعموكي ماردوكي لعندي
انا هون تجمدت بأرضي وكلامو نزل علي متل الڼار
انا : والله معنا نطعميها بس انت الظاهر ماخرج تحوي نسوان ليك صهر هلق معي طعمي بنتي وبنتك بس مايضل معي مصاري لطعميهم برجعلك اياها
اخدت بنتي ونزلت ودموعي على خدي مقهور لانو فسر احترامنا الو وحرصنا منشان مانخرب بيت بناتنا انو ضعف وقلة حيلة
المهم خليت بنتي وحفيدتي عندي وقلتلها: بقطع من لحمي وبطعميكي انت وبنتك مابدي اياك تاكلي هم شي
بنتي: والله يا بابا على طول هيك بعايرني بفقرنا مع انو لما اخدتو كان فقير ولما ربنا عطاه كل يوم إهانات وذل بس انا ماكنت احكيلكم منشان ماتنقهروا
ومرت الايام وحس انو رب العالمين عم يرزقني ويباركلي بمالي
صهري اتصل فيني وقلي : امتى بدها ترجع بنتك لبيتها .؟؟؟.انا كل مرة قلو جملة وحدة لسا معي طعميها وطعمي بنتك
صار يهددني انو راح يطلقها وانا قلو بالناقص
سبحان الله حس حالي أني قوي وانو رب العالمين راح ينصف هل البنت.
وفي يوم جوزها بعتلها ورقة الطلاق... بنتي زعلت وانقهرت منشان بنتها فأنا قلتلها انو ربك راح يختار لك الخير
بعد سنة اتقدم لبنتي شب من عيلة واخلاقو كتير كويسة ووضعو مرتاح وهو قبل انو بنتها تسكن معها
انا هون طرت من الفرح لانو رب العالمين استجاب لدعائي
اتجوزت بنتي ومرت. الايام والسنين ورجعت بنتي حردت منشان مشكلة بينها وبين جوزها .فلما حكتلي اعرفت انو الحق عليها فقلتلها يالله راح اخدك عند جوزك
بنتي دقت الباب فلما فتح جوزها اطلع فيها وقلها بتعرفي انو البيت مو حلو من دونك واطلع فيني وقلي يا عمي انت جايبها. بنفسك والله فضلت على راسي
هون انا صرت ابكي وعيوني تجري نهر دموع
صهري استغرب وقلي عمي فيك شي؟؟
انا قلت وصوتي عم يغص من البكاء انا هلق اطمنيت على بنتي وراح مۏت وانا مرتاح ومبسوط الله يجبر بخاطرك متل ماجبرت بخاطري
